Pandiran Warung: ”sahibar kisah wara”

Pandiran Warung: ”sahibar kisah wara”

Ini ti pamandiran lawas pang, kada ingat jua, suahkah hudah tapandirakan atawa takisahakan ngaran sapapalih kalumpanan jua masi ngaran sabak di kapala. Mun lakun taputar kasit lawas, dimamaklumi sapalih haja, kada sarana ditarusakan mambaca. 

Tahulah buhan pian wan nang ngaran hutanan? 

Nang masi, di hutanan ni musti ada rajanya, mun kada singa atanapi macan. Nah, singa atanapi macan nitu inya cakada dipilih kaya kanu kita nia pang. Inya jadi raja marga inya kuat wan harat kalahi. Macan tu, mantang inya raja, napa nang dikahandakinya musti ditulusakan, musti dikajahakan. Jangan nangitu, satua di hutan gin, kabilanya lapar, dingangamnya tu pang. Sapi, sapi diuntalnya! kambing, kambing disulumnya! Pilanduk, pilanduk digarihnya! Kancil, kancil disumpalnya! Napa amun inya pang nang paharatnya.

Nang masi, buhannya lah, nang jadi wajir-wajirnya, atau ujar astilah wahini, iya bubuhan mantri, ajabat, atawa lakun aparat pamarintahnya, iya bubuhan kunyuk. Nang bangaran kunyuk ni, bah! Liwar culasnya! Handak manungap hayam, inya jadi hayam. Handak marungkup kambing, inya jadi kambing! Handak mahantup sapi, inya jadi sapi! Liwar culasnya tupang! Culas kakaya Durna tu nah. Urang hirang, inya umpat hirang! Urang habang, inya umpat habang! Wan nang masi inya kada saurangan, musti babawaan kakawalannya.

Nah, nang jadi lakun aparat atawa biking singa atanapi macan ni iya buhan buhaya. Buhaya ni, buahnnya lah, liwar banar jua. Inya, jangan wan nang lain, papadaannya haja sarajin mau taparabut kahandak. Maka mun hudah kaya dintu, musti kalahi tu pang. Buhannya ni lakun paranai haja, tagal pang sakali banganga, wasi jambatan gin pagat. Takana malawan ka Raja, takana mahamba. Tagal tutih, inya bujur paranai, kada banyak bunyi, tagal awas ha. Tang ditungapnya ha!

Mun bahari, buhannya lah, rahat sanja kuning pa mangaluar tu buhaya di tabing banyu. Kadada nang waninya tu pang bakucau banyu ka batang kabila sanja kuning. Matan ha batamuan wan buhan buhaya nitu ti. Gair banar tupang salamanan.

Satua nang lakun jadi warga di hutanan niti iya bubuhan kambing atawa bilang kaya kambing barataan bilangnya. Dimapa kada kaya kambing, mun napa-apa ujar raja, manyahut; mbeeee! Dihirit urang; mbeeee! Handak makan; mbeee! Sampai handak di sumbalih, yatu ; mbeeeeee... jua! Napangada, maginnya singa atanapi macan nang jadi raja tuti sakahandaknya!

Sasadangnya, mbeee... kaina dintu pulang. Mbeee... pulang... 

Kalinya, buhannyalah, ada jua warga hutanan ni nang cardas tagal pang culas jua. Takana mau haja jua baparigal kaya kambing, takana kakaya kunyuk. Nah, ngaran satuanya iya Musang!

 

Umaaaa..., buhannya ai. Nang ngaran musang ni, babahaya banar jua kalinya. Tapin buhan musang nia cakada masuk lakun bubuhan astana, tamasuk bubuhan jaba jua, tagal parigal harat pada nang jaba. Ajabat kada, tagal laku harat pada ajabat. Wayah takumpul wan kambing, inya kakaya kambing jua. Takumpul wan kunyuk, mau mamangsa jua. Nang cilaka ni, buhannya lah, musang ni tapintar manyimpan parigal nang kada baik tu. Tagal, kalakuan alahan pada buhan kunyuk. Kada kawa disurung daging, daging mamakan. Disurung buah, buah dihantupnya. Asal inya kanyang haja, nang siapa apakah manyurungi. Samana pulang inya nang ngaran cardas lahai, bubuhan kambing cakada tahu parigal inya nang kaya itu ti. Baik ham tarus diliat... 

Amun sual ambung ma ambung, musang ni am undasnya. Raja, raja di ambungnya. Wajir, wajir di ambungnya. Mantri, mantri di ambungnya. Bilang babarataan ham diambungnya, asal urang himung.  Maka lakun nang masi-masi ti harat pada buhan wajir, tagas pada mantri. Ka mana raja, di situ jua inya ba andah. Mudil handak diliat pada patuh banar tu pang wan raja. Maka katuju banar tampil ka muka. Kamaandakannya ha jua raja ni katuju wan musang ni. Inya marga nyaman tu pang kalu disatir.... kalu ah.

Mun urusan maatur pamakan warga atawa babagi jatah kumpai, buhannya ni pa iyanya nang bapandir. Kaya buhannya tu pang nang pamintarnya. Ada buhan wajir wan mantri ni, ranai haja jua maliatakan, asbab buhannya musti nang pambanyaknya jua dapat. 

Pian tahulah mangkih? Nah, buhannya lah mamadahi. Mangkih tu sabangsa iwak nang katuju batikap di batu. Paribasanya mun dapatnya mangkih ni, batu gin mining dijilatnya. Nah, musang tu kukurang iya haja parigalnya kaya mangkih tu. Pantar kaya musang kalakuuan. Tagal inya lain baju haja. Takana babaju hayam, takana babaju kunyuk, takana babaju kambing. Takana kada sing bajuan! Kanapa maka kada sing bajuan? Kabilanya tumbur urang, inya baugah, mambuang bakas, kisah kada tahu!

 

Han, kacamitu tu parigal mangkih. Kada mambari muar lah?

Liwar jua kalu? Cardas wan culas ni, buhannya ai, kabila tadundum ada kanu nang siapa-apakah, alahan pada napa. Saraba ngalih tu pang ditangguh.

 

Jadi, buhannya lah, buhan pian bahati-hati ha lah. Kalu ham batamuan wan nusia kakaya musang atawa mangkih ni. Inya pintar manyimpani kalakuan. Dikawani, mau mamangsa. Kada dikawani bisa batangsa.

Nitu pang handak ulun kisah hari ini ti nah. Mangaji sudah urang di masigit, handak mandi hulu basiap bajumahat.

_(Kayla Untara, 03/08)_